بەڕێوەبەرایەتیی هاتوچۆی هەولێر کۆمەڵێک رێنمایی بۆ شۆفێران لە مانگی رەمەزاندا بڵاوکردەوە کە لە بەشێکیدا هاتووە، پێویستە پێش کاتژمێر 4:00 ی عەسر پێداویستییەکانی رۆژوو شکاندن کڕدرابن.
رێنماییەکانی هاتوچۆی هەولێر لە مانگی رەمەزاندا بریتین لە:
-پێویستە لێخوڕین بەو خێراییە بکرێت کەبەپێی هێماکانی هاتووچۆ دیاریکراوە، نەک زێدەڕۆیی بکرێت، چونکە رێگا هەمان رێگای جارانە و ئۆتۆمبێلەکەشتان هەمان ئۆتۆمبێلە، ئەوەی لە مانگی پیرۆزی رەمەزاندان گۆڕانکاری بەسەرداهاتووە جەستەی ئێوەیە کە بەهۆی ڕۆژوبون شەکر و فشاری خوێنتان دادەبەزێت و دەبێتە هۆی بێتاقەتی، بەمەش توانای شوفێریتان کەمتر دەبێتەوە، جا ئەگەر تیژڕۆ بن ئەوەندەی تریش تواناکانتان کەمدەبێتەوە.
-پێویستە بەر لە سواربوونی ئۆتۆمبێل تەماشایەکی خۆتان بکەن وگوێ لە زمانی جەستەتان بگرن، ئەگەر هەستتان کرد کە بێتاقەتن، یان زیاد لە رادەی ئاسایی توڕەن یان خەوتان دێت، شوفێری نەکەن.
-پێویستە پێداویستیەکان رۆژوو شکاندن (پەقلاوە، ترشیات،شەربەت،خورما،هەرشتێکی تر کەپێویست بێت) بەر لەکاتژمێر4:00 ی ئێوارە کڕابێت، بۆئەوەی لەو کاتە بەدواوە کە بێتاقەتی لە لوتکەیە، تووشی ئەوەنەبن بچنە بازاڕ بۆ شت کڕین، چونکە لە گەڕانەوە تووشی دۆخێکی نالەبار دەبن و ناچار دەبن تیژڕۆیی بکەن.
-پێویستە چاوتان بە بەردەوام لەسەر رێگاو دەوروبەری بێت وچاوتان بەردەوام بێت لە گەڕان لە پیادەکان کە ئەوانیش بەهۆی بەڕۆژوبوون تەرکیزیان لەدەست دەدەن و لەوانەیە بە بێئاگایی بپەڕنەوە.
-بۆشوفێرانی بارهەڵگروتاکسیەکانی هێڵی دەرەوە، پێویستە هەر لە پاش نوێژی تەراویح بخەون، ئەگەر بەنیاز بن لە پاش نوێژی بەیانی دەربچن بۆ سەر کارەکانیان، نابێت تاکو پارشێو بەخەبەربن و لەدوای نوێژی بەیانی بچنە سەرکار،چونکە لەو حاڵەتە خەوەکانیان لە پشتی ستێرنی ئۆتۆمبێلەکان تەواو دەکەن، بەمەش تووشی رووداو و کارەسات دەبنەوە.
-پێویستە زۆر بەئاگاییەوە لەیەکتربڕەکان نزیکببنەوە تەنانەت ئەگەر رێگایەکان چۆڵیش بن، چونکە مەترسیدارترین شوێن لەشەقامەکان یەکتر بڕەکانە.
