ئەنجومەنی دادوەریی هەرێمی کوردستان ئاماری ساڵی رابردووی هاوسەرگیری و جیابوونەوەی بڵاوکردەوە، بەپێی ئامارەکە نزیکەی 14 هەزار حاڵەتی جیابوونەوە تۆمارکراون.
لە ئامارەکەی ئەنجومەنی دادوەریدا هاتووە، لە ساڵی 2022دا، لە هەولێر، سلێمانی، دهۆک و گەرمیان، 55 هەزار و 896 پرۆسەی هاوسەرگیری تۆمارکراون، 13 هەزار و 967 جیابوونەوەی نێوان هاوسەرانیش تۆمارکراون.
هەر بەپێی ئامارەکە ژمارەی جیابوونەوە لە ساڵی 2022دا بەراورد بە ساڵی 2021 زۆر زیادی کردووە.
لە ساڵی 2021دا، لە دادگاکانی هەرێمی کوردستان، 11 هەزارو 699 حاڵەتی جیابوونەوە تۆمارکراون، بەڵام لە ساڵی 2022دا ژمارەکە هەڵکشاوە بۆ 13 هەزار و 967 حاڵەتی جیابوونەوە و بەوەش لە ساڵی 2022دا 2 هەزار و 268 حاڵەتی جیابوونەوە زیادیکردووە.
