بەڕێوەبەرایەتیی پۆلیسی هەولێر رایدەگەیەنێت، ژنێك لەلایەن هاوسەری پێشووی لەناو بازاڕی قوشتەپە كوژرا.
بەپێی راگەیەندراوێكی بەڕێوەبەرایەتیی پۆلیسی هەولێر كە وێنەیەكی دەست تۆڕی میدیایی ئێستا كەوتووە و تێیدا هاتووە، كاتژمێر 5:00ی ئێوارەی ئەمڕۆ شەممە، بەڕێوەبەرایەتیی پۆلیسی پارێزگای هەولێر ئاگاداركرانەوە لەبوونی ڕووداوێكی كوشتن لە سنووری قوشتەپە.
لە راگەیەندراوەكەدا هاتووە، دەستبەجێ تیمێكی لێكۆڵەر گەیشتنە شوێنی رووداوەكە و دەست بە لێكۆڵینەوە كرا و لە لێكۆڵینەوەكان دەركەوت كەوا ژنێكی تەمەن 22 ساڵ، لەلایەن هاوسەری پێشووی تەمەن 26 ساڵ، لەناو بازاڕی قوشتەپە لەسەر كێشەیەكی كۆنی نێوانیان بە گوللە لێی دراوە و گیانیلەدەستداوە.
پۆلیسی هەولێر دەڵێت، “پەڕاوی لێكۆڵینەوە بۆ ڕووداوەكە ڕێكخرا و ڕەوانەی دادگای لێكۆڵینەوەی هەولێر كرا بۆ ئەوەی ڕێڕەوی یاسایی بەرامبەر تۆمەتبار بگیرێتە بەر”.
