عوسمان غانمی، وەزیری ناوخۆی عێراق ئەمڕۆ یەكشەممە 13ی كانونی یەكەم ڕایگەیاند، “هێزی زیاتر لە شنگال جێگیردەكەن.”
بڵاوكردنەوە و جێگیركردنی هێزی زیاتر، “بە گوێرەی ڕێككەوتنی نێوان هەولێر و بەغداد دەكرێت و مەبەست لێی ئامادەكاری و ڕێگەخۆشكردنە بۆ گەڕاندنەوەی ئاوارەكانی شنگال”، وەك غانمی لە كۆنگرەیەكی ڕۆژنامەوانییدا لە بارەگای فەرماندەیی پۆلیسی نەینەوا ڕایگەیاند.
ناوبراو وتیشی، سەرباری زیادكردنی ژمارەی كارمەندانی پۆلیس و بڵاوكردنەوەی هێزی ئەمنی لە ناوچەكەدا، فەرمانیكردووە “بە كردنەوەی فەرمانگەكانی هاتوچۆ و پۆلیسی فریاكەوتن و نەهێشتنی تاوان لە شنگال لەپێناو بەرقەراركردنی ئاسایش و گەڕاندنەوەی ئاوارەكان.”
وەزیری ناوخۆی عێراق دوای سەردانێكی مەیدانی بۆ شنگال، لە كۆنگرە ڕۆژنامەوانییەكەیدا لە موسڵ ئاشكرایكرد كە “ڕێككەوتنی شنگال خراوەتە بواری جێبەجێكردنەوە و كارەكان بە ئاسایی بەڕێوەدەچن و تا ئێستا دۆخەكە باشە، لە ڕۆژانی داهاتووشدا بڕگەكانی ڕێككەوتنەكە زیاتر جێبەجێ دەكرێن.”
