وەزارەتی گەنجینەی ئەمریکا رایگەیاند، دوای کۆبوونەوەی نێوان شاندی ئەمریکا و عێراق هەردوولا جەختیان لە پەبەندبوونیان بە رێوشوێنەکانی رێگریکردن و بەرەنگاربوونەوەی سپیکردنەوەی پارە و پاڵپشتیکردنی تیرۆر کردەوە.
لە راگەیەندراوێکدا وەزارەتی گەنجینەی ئەمریکا ئاشکرایکرد، “واڵی ئادیمۆ، جێگری وەزیری گەنجینەی ئەمەریکا و فواد حسێن وەزیری دەرەوەی عێراق و عەلی عەلاق، پارێزگاری بانکی ناوەندیی عێراق پێکەوە گفتوگۆیان لەسەر دۆخی ئابووریی عێراق و پلانەکانی حکومەت بۆ چاکسازی لە کەرتی ئابووری و داراییدا کرد”.
لە ڕاگەیەندراوەکەدا ئاماژە بەوەشکراوە، “هەردوولا جەختیان لە گرنگی پابەندبوونی هاوبەش بە ڕێوشوێنەکانی دژە سپیکردنەوەی پارە و پاڵپشتیکردنی تیرۆریستان کردەوە، هەروەها جەختیانکردەوە لە بەردەوامبوونی پەیوەندییە ئابوورییە دووقۆڵییەکانی نێوان ئەمریکا و عێراق، کە ئامانجیان بەهێزکردنی ئابووریی عێراقە”.
بەپێی وەزارەتی گەنجینەی ئەمریکا، لە کۆبوونەوەکەدا، هەردوولا باسیان لە “ئاڵنگارییە ئابوورییەکان لە عێراق کردووە، لەوانە گەندەڵی، پشتبەستن بە وزە، و پرسی نرخی دۆلار”.
