ئەنجومەنی دادوەریی هەرێمی کوردستان بڕیاری قەدەغەکردنی تۆڕە کۆمەڵایەتییەکانی لە دادوەران دا، ئەنجومەنەکە دەڵێت، “لەگەڵ هەیبەت و شکۆی پیشەکەیان ناگونجێت”.
بە بڕیارێک کە لەلایەن عەبدولجەبار عەزیز سەرۆکی ئەنجومەنی دادوەریی هەرێمی کوردستانەوە دەرکراوە و رەزامەندیی سەرجەم ئەندامانی ئەنجومەنەکەی لەسەر دراوە، بڵاوکردنەوەی وێنەی کەسی، لێدوان و کۆمێنت لەسەر بابەتە جیاوازەکان لە تۆڕە کۆمەڵایەتییەکان لە دادوەران قەدەغە دەکات.
بەوپێیەش، هەر دادوەرێک سەرپێچیی بڕیارەکە بکات رێکاری یاسایی بەرامبەر دەگیرێتەبەر.
لە بڕیارەکەدا هاتووە، “ماوەیەكە تێبینی دەكرێت بەشێك لە دادوەران لە تۆڕە كۆمەڵایەتییەكان لێدوان و كۆمێنت لەسەر پرس و بابەتە جیاجیاكان دەدەن، هەروەها لە رێگەی ئەم تۆڕەوە پەیوەندیەكی فراوانیان درووست كردووە، جگە لەوەش هەڵدەستن بە بڵاوكردنەوەی وێنەی خۆیان كە بەشێوەیەك دەردەكەون لەگەڵ هەیبەت و شكۆی پیشەكەیان ناگۆنجێت”.
ئاماژە بۆ ئەوە کراوە، “بۆ پاراستنی ناو و هەیبەت و شكۆی دادوەران ئەنجومەنی دادوەری بە كۆی دەنگی ئامادەبووان بڕیاریدا بە پابەندكردنی دادوەران بە خۆ دوورگرتن لە بابەتەكانی ئاماژە پێكراو بە پێچەوانەوە رێكاری یاساییان بەرامبەر دەگیرێتەبەر”.
