وەزارەتی خوێندنی باڵا و توێژینەوەی زانستیی هەرێم رایدەگەیەنێت ، لە پێشبڕكێیەكدا خوێندكارانی زانكۆكانی كوردستان پلەی دووەمیان لەسەر ئاستی رۆژهەڵاتی ناوەڕاست بەدەستهێنا.
بەپێی راگەیەندراوێكی وەزارەتی خوێندنی باڵا و توێژینەوەی زانستیی هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە، وەزیری خوێندنی باڵا و توێژینەوەی زانستی خەڵات و ڕێزلێنانی پێشكەش بە خوێندكارانی زانكۆكانی هەرێمی كوردستان كرد، كە لە پێشبڕكێی هواوی (ICT) بەشداریانكردووە و پلەی دووەمیان لەسەر ئاستی رۆژهەڵاتی ناوەڕاست بەدەستهێناوە.
هەر لە راگەیەندراوەكەدا هاتووە، لە هەرێمی كوردستان هەریەك لە زانكۆكانی سەڵاحەدین و پۆلیتەكنیكی هەولێر و لوبنانی فەرەنسی بەشداربوونە، تیمێك لە بەشداربووان پلەی دووەم و ئەوانی دیكەش پلەی حەوتەمیان بەدەستهێناوە، لە هەردوو تیمەكەشدا لە كۆی شەش خوێندكار چواریان خوێندكاری زانكۆكانی هەرێمی كوردستانن.
