قائیمقامی پێنجوێن رایگەیاند، لەسەر داوای هاوڵاتییانی پێنجوێن و لەبەر رێزی ئەوان سبەی دەچێتەوە سەر کارەکەی و لە داوای دەستلەکارکێشانەوەکەی پاشگەزدەبێتەوە.
زانا عەبدولرەحمان قائیمقامی پێنجوێن رایگەیاند، “سبەی بە رێزی ئەم هاوڵاتییانەی شاری پێنجوێن دەگەڕێمەوە سەر کارەکەم لە قائیمقامیەتی پێنجوێن دەست بە کارەکانم دەکەمەوە”.
وتیشی،”من هیچم بۆ هاوڵاتییانی پێنجوێن نەکردووە، ئەمان ئەم کارە بۆ من دەکەن، سوپاسی هەموویان دەکەم”.
ئەمە لە کاتێکدایە، لەدژی کەمکردنەوەی ماوەی پێدانی کارەبای نیشتیمانی لە سنوورەکەیان، ماوەی چەند رۆژێکە دانیشتوانی پێنجوێن مانگرتنیان راگەیاندووە و خودی قائیمقامی شارەکەش بڕیار دەستلەکارکێشانەوەی لە پۆستەکەی راگەیاندبوو.
ئەمڕۆ یەکشەممە هەڤاڵ ئەبوبەکر پارێزگاری سلێمانی رایگەیاند، “لەمڕۆوە كارەبای قەزای پێنجوێن چاكدەكرێت و سیستمی زیرەك بۆ زامنكردنی كارەبای هاوڵاتییان دادەنرێت”، دواتریش هاوڵاتییان کۆتاییان بە مانگرتنەکانیان هێنا و بەرەو ماڵی قائیمقام بەڕێکەوتن و لە بڕیارەکەی پاشگەزیان کردەوە.
