سەردانە چاوەڕواننەكراوەكەی مەسرور بارزانی سەرۆكی حكومەتی هەرێم بۆ بەغداد كە وابڕیارە سبەینێ ئەنجامی بدات لە كاتێكدايە كە بافڵ جەلال تاڵەبانی سەرۆكی یەكێتیی نیشتمانیی كوردستان بە چڕی هەوڵەكانی خستەگەڕ كە بەغداد 400 ملیار دینارەكە بۆ هەرێمی كوردستان رەوانە بكات.
بەپێی زانیارییەكانی تۆڕی میدیایی ئێستا، لە دوای كۆبوونەوەكەی شەوی ڕابردووی هاوپەیمانیی بەڕێوەبردنی دەوڵەت كە سەرۆك بافڵ ئامادەی بوو بڕیاری ناردنی ئەو 400 ملیار دینارە دراوە.
هەر ئەمڕۆ سێشەممە، نزار ئامێدی وەزیری ژینگەی عێراق لە لێدوانێكدا بە تۆڕی میدیایی ئێستای راگەیاند، بەپێی بڕیاری نوێی ئەنجومەنی وەزیرانی عێراق 400 ملیار دینارەكە لە بانكی ( تی بی ئای) بۆ هەرێمی كوردستانی رەوانە دەكات و وەزارەتی دارایی عێراقیش كەفالەتی ئەو بڕە پارەیە دەكات كە دەنێردرێت بۆ هەرێم تاوەكو پەسەندكردنی بودجەی ساڵی 2023 دەكرێت و بە فەرمی ئەو بڕە پارەیە وەك پشكی هەرێم لە بودجەدا جێیدەكرێتەوە.
