فیلمی سینەمایی “زاڵاوا”ی دەرهێنەری کورد ئەرسەلان ئەمیری لە 78ـەمین خولی فێستیڤاڵی نێودەوڵەتیی فیلمی ڤینس لە ئیتاڵیا خەڵاتی بەدەستهێنا.
فیلمی زاڵاوا کە زۆرینەی دیمەنەکانی لە ڕۆژهەڵاتی کوردستان بە هەردوو زمانی کوردی و فارسی تۆمارکراون، دوێنێ 10ی مانگ لە شاری ڤینس لە ئیتاڵیا نمایشکرا.
فیلمەکەی ئەرسەلان ئەمیری لە بەشی Critics’ Week خەڵاتی بەدەستهێنا و خوودی دەرهێنەری فیلمەکە لە فێستیڤاڵەکەدا خەڵاتەکەی وەرگرت.
فیلمی زاڵاوا کە باس لە مێژووی نزیكی گوندێکی کوردنشین دەکات، بۆچوونە لۆژیکی و زانستییەکان لەبەرامبەر خورافییاتدا سەردەخات.
ئەرسەلان ئەمیری لە فیلمەکەدا هەوڵیداوە لەڕێگای سینەماوە بۆچوونە ڕاست و زانستییەکان سەبارەت بە ژیان و گوزەرانی خەڵک نیشانبدات، ئەگەرچی لەو شوێنەدا خەڵکی زیاتر بڕوایان بە خورافییاتەکان هەبووە.
فیلمی زاڵاوا سەرباری ئەوەی تێچوویەکی کەمی هەبووە، بەڵام بەدەستهێنانی خەڵاتی نێودەوڵەتیی فیلم لە ئیتاڵیا، ئەوەی سەلماند كە دەرهێنەر و بۆچوونی هونەری دەتوانن شاکاری نوێ لە سینەمادا بەرهەمبهێنن.
فیلمی زاڵاوا لە دەرهێنانی ئەرسەلان ئەمیری و بەرهەمهێنەری لالیەن سەمیرە برادەری و روحوڵڵا برادەری-یە، هاوکات ئایدا پەناهەندە سیناریستی فیلمەکەیە.
ئەمە ترەیڵەری فیلمی زاڵاوایە
