پاڵاوگەیەك دەكەوێتەكار و رۆژانە 12 ملیۆن لیتر بەنزینی ئۆكتان 95 بەرهەمدەهێنێت
حكومەت پاڵاوگەیەك دەخاتەكار كە رۆژانە نۆ بۆ 12 ملیۆن لیتر بەنزینی ئۆكتان 95 بەرهەمدەهێنێت و جەختدەكاتەوە كە كۆتایی بە هاوردەكردنی بەنزین دەهێنن.
حەیان عەبدولغەنی جێگری سەرۆك وەزیران و وەزیری نەوتی عێراق رایگەیاند، بەرهەمی بازرگانیی پاڵاوگەی كەربەلا لە نەوت و بەنزین دەخەنە بازاڕەوە و كوالێتییان بەرزە.
بەپێی وتەی وەزیری نەوت، بەنزینی ئۆكتان 95 لەو پاڵاوگەیە بەرهەمدەهێنن و سەرەتا رۆژانە هەشت بۆ نۆ ملیۆن لیتر بەنزین دەخەنە بازاڕەوە و دواتر زیاددەكرێت بۆ 12 ملیۆن لیتر.
وتیشی، “ئەو بڕە لە بەنزین 75%ـی پێداویستیی ناوخۆ لە بەنزین پڕدەكاتەوە و دواتر پەرە بە پاڵاوگەكانی تر دەدەین و گشت پێداویستیی ناوخۆ لە بەنزین پڕدەكەینەوە”.
حەیان عەبدولغەنی جەختیكردەوە كە ئەو بەنزینەی بەرهەمیدەهێنن، بەپێی پێوەرەكانی ئەوروپا “یۆرۆ 5” دەبێت و لە مانگی ئازاری داهاتووەوە دەستدەكرێت بە بەرهەمهێنانی.
