وەزارەتی دەرەوەی عێراق رایدەگەیەنێت، وڵاتەكەی بەڵگەنامەی پەیوەستبوونی بە رێککەوتننامەی سەلامەتی ئەتۆمی پێشكەشی ئاژانسی نێودەوڵەتیی وزەی ئەتۆم كردووە.
ئەحمەد سەحاف، وتەبێژی وەزارەتی دەرەوە رایگەیاند، عێراق بەڵگەنامەی پەیوەستبوونی بە رێککەوتننامەی سەلامەتی ئەتۆمی و، رێككەوتنی هاوبەش دەربارەی بەڕێوەبردنی سەلامەتی سووتەمەنی بەکارهێنراو و بەڕێوەبردنی سەلامەتی پاشماوەی تیشکدەر پێشكەشی ئاژانسە نێودەوڵەتییەكە كردووە.
رۆژنامەی وەقائعی فەرمیی عیراق لە 28ی ئایاری رابردوو بڕیاری پەیوەستبوونی كۆماری عیراق بە رێككەوتننامەی هاوبەشی دەربارەی بەڕێوەبردنی سەلامەتی سووتەمەنی بەکارهێنراو و بەڕێوەبردنی سەلامەتی پاشماوەی تیشکدەری بڵاوكردەوە.
