لە داهاتوویەکی نزیکدا یانەی بوروسیا دۆرتمۆند کۆبوونەوەی یەکلاکەرەوە لەگەڵ جوود بێلینگهامی ئەستێرەی لاوی ئینگلتەرا ئەنجام دەدات، تیایدا بڕیار لەسەر داهاتووی دەدرێت.
ڕۆژنامەی “ئەی ئێس”ی ئیسپانی نووسیویەتی، تاوەکو 6ی کانوونی دووەمی 2023 (ئەم مانگە)، جوود بێلینگهام کۆبوونەوەیەکی یەکلاکەرەوە لەگەڵ بەڕێوەبەرانی “ڤێستیڤالین” بە سەرپەرشتی هانز یواکیم ڤاتسکە و سباستیان کیل ئەنجام دەدات.
لە کۆبوونەوەکەدا بڕیاردەدرێت گرێبەستی بەهرەدارەکەی ئینگلتەرا نوێبکرێتەوە، یاخود دەستبەرداریبن پەیوەندی بە یانەیەکی دیکەوە بکات، کە ئەوەش هەمان ستراتیجی گرێبەستی ئێرلینگ هالاندە.
نرخی یاریزانەکە بە (100) ملیۆن یورۆ خەمڵێنراوە و یانەکانی لیڤەرپوڵ، مان سیتی، نیوکاسڵ، ڕیاڵ مەدرید لەنێو هاوکێشەکەدان، نزیکترینیشیان یانەکانی ڕیاڵ مەدرید و لیڤەرپوڵن.
