دادگای میانمار حەوت ساڵی دیکەی بۆ سزای زیندانیکردنی سان سو کی سەرۆکی پێشووی وڵاتەکەی درێژکردەوە.
میدیاکانی میانمار بڵاویانکردەوە، “دادگای میانمار کە لە ئێستادا لە دەستی سوپای وڵاتەکەدایە، لەدوای ئاراستەکردنی پێنج تۆمەتی دیکەی گەندەڵی تایبەت بە بازرگانیکردن بە مرۆڤ و کڕینی هێلیکۆپتەر و بەکارهێنانی لە کاتی کارەسات و کاروبارەکانی دەوڵەتدا، سزای حەوت ساڵ زیندانیکردنی دیکەی بەسەر سان سو کی سەرۆکی پێشووی وڵاتەکەدا سەپاند”.
بە زیادکردنی حەوت ساڵ زیندانیکردن، سزای زیندانیکردنەکانی ئەو سەرۆکە ژنە بۆ 33 ساڵ بەرزبووەوە.
سان سو کی تەمەنی 76 ساڵە و هەڵگری خەڵاتی نۆبڵی ئاشتییە، هەفتەی رابردوو ئەنجومەنی ئاسایشی نێودەوڵەتیش بە فەرمی داوای ئازادکردنی کرد.
