پۆلیسی راپەڕین دەستگیرکردنی کەسێکی بە تۆمەتی کوشتنی ئەو هاوڵاتییەی دوێنێ لە قەڵادزێ تەرمەکەی دۆزرایەوە راگەیاند.
بەڕێوەبەرایەتیی پۆلیسی راپەڕین بڵاویکردەوە، “پاش ئەوەی دوێنێ سێشەممە هێزەکانمان ئاگادارکرانەوە بەبوونی تەرمێک لە قەڵادزێ دەستبەجێ دەستکرا بە لێکۆڵینەوە لە رووداوەکە، دوای گرتنەبەری رێککاری یاسایی و بەدواداچوون و کۆکردنەوەی زانیاری تواندرا بکوژ بدۆزرێتەوە”.
ئاماژەی بەوەش کرد، “دوای دەستنیشانکردنی شوێنی بکوژ، هێزێکی بەڕێوەبەرایەتیی پۆلیسی راپەڕین بەسەرپەرشتی بەڕێوەبەری بەشی پۆلیسی فریاکەوتنی رانیە و بە هاوکاری ئەفسەر و کارمەندانی و پۆلیسی فریاکەوتنی قەڵادزێ و بنکەی پۆلیسی قەڵادزێ و مکافحەی قەڵادزێ تۆمەتباری بکوژ لەناو شاری رانیە دەستگیر کرا”.
ئاشکراشیکرد، “دوای لێکۆڵینەوە لەگەڵیدا دانانی ناوە بە تاوانەکەیدا و بە وتەی خۆی ” ئەو ( ئـ . ر .ٲ )ی کوشتووە، هەر بۆیە بە بڕیاری بەڕێز دادوەر تۆمەتباری بکوژ بەپێی ماددەی 406 راگیرا و پەڕاوی لێکۆڵینەوەشی بۆ رێکخراوە”.
دوێنێ سێشەممە لە نزیک شەقامی 60 مەتری قەڵادزێ، تەرمی هاوڵاتییەک بەناوی ( ئـ . ر .ٲ ) رەگەزی نێر، لەدایکبووی ساڵی 1973، دۆزرایەوە و دوای گواستنەوەی بۆ نەخۆشخانە و توێکاری بۆ تەرمەکەی دەرکەوت شوێنەواری پێنج فیشەکی چەکی جۆری کڵاشینکۆف بەسەر جەستەیەوە هەیە.
