بەرپرسانی تۆپی پێی ڕووسیا تاوتوێی پەیوەندیکردن بە فیدراسیۆنی تۆپی پێی ئاسیا-وە دەکەن، لە بەرامبەردا ئەوروپییەکان بەڵێنیان پێدەدەن سزای سڕکردنیان لە خولە ئەوروپییەکان هەڵبوەشێننەوە.
هەینی ڕابردوو، لیژنەی جێبەجێکاری سەر بە فیدراسیۆنی تۆپی پێی ڕووسیا کۆبوونەوەیەکی گرنگ و چارەنوسسازی ئەنجامدا، تەوەری کۆبوونەوەکەش بریتیبوو لە کشانەوەی فیدراسیۆنەکە لە تۆپی پێی ئەوروپا (یوێفا) و پەیوەندیکردن بە فیدراسیۆنی تۆپی پێی ئاسیا.
سەرچاوەیەک لە (یوێفا) بە میدیاکانی ڕاگەیاندووە، کە فیدراسیۆنی ئەوروپا نایەوێت ڕووسیا لەدەستبدات، بە ئەگەرێکی زۆرەوە لە ماوەی داهاتوودا سزای سڕکردنیان لە خول و پاڵەوانێتییەکان هەڵدەوەشێننەوە، بەتایبەت دوای خاوبوونەوەی کێشە جیۆسیاسییەکان.
بەهۆی جەنگی نێوان ڕووسیا و ئۆکرانیا-وە، لە 28ی شوباتی 2022 فیدراسیۆنەکانی تۆپی پێی جیهان و ئەوروپا بڕیاریاندا بە سڕکردنی هەڵبژاردەی ڕووسیا و یانەکانی ئەو وڵاتە لە سەرجەم خول و پاڵەوانێتیە ئەوروپی و نێودەوڵەتییەکان، سەرەڕای ئەوەی بەردەوام ئاماژە بەوە دەکەن، کە وەرزش پەیوەندی بە بابەتە سیاسییەکانەوە نییە.
