شەوی رابردوو لە ئاهەنگێکدا، شاجوانی فەرەنسا بۆ ساڵی 2023 هەڵبژێردرا کە کچێکی تەمەن 18 ساڵ بوو بە ناوی ئیندێرا ئەمبیۆ.
شەوی رابردوو لە ئاهەنگێکی گەورەدا کە چەندین کچ لە شارە جیاوازەکانی فەرەنساوە بەشداریان تێداکردبوو شاجوانی فەرەنسا بۆ ساڵی 2023 هەڵبژێردرا و تاجی شاجوانی لەسەرنرا.
ئەندێرا ئەمبیۆ، کچێکی تەمەن 18 ساڵی خوێندکاری بەشی پەیوەندییەکان، وەک نوێنەری ناوچەی گوادلوپ، بەشداری ئاهەنگەکەی کردبوو، توانی نازناوەکە بەرێتەوە.
ئەمبیۆ لە وتارێکدا کە لە ئاهەنگەکەدا پێشکەشی کرد، پاڵپشتی خۆی بۆ تووشبوانی شێرپەنجە دەربڕی و هانیدان بەهێز بمێننەوە، پاڵپشتی خۆیشی بۆ هەلبژاردەی وڵاتەکەی دووپاتکردەوە کە ئەمشەو یاری کۆتایی مۆندیالی 2022 لە قەتەر لەبەرامبەر هەڵبژاردەی ئەرجەنین ئەنجامدەدەن.
ساڵانی رابردوو، مەرجەکانی هەڵبژاردنی شاجوان لە فەرەنسا قورس بوون بۆ ئەمساڵ بەشێک لە مەرجەکان کەمکرابوونەوە، کە دیارترینیان رێگەدان بوو بە کچانی 18 ساڵ بەشداری بکەن، هاوکات مەرجی نەبوونی تاتۆ لابرا و دیاریکردنی باڵاش وەک مەرجی سەرەکی بەهەند وەرنەگیرابوو، ئەمەش رای جیاوازی لای کچانی ئەو وڵاتە لێکەوتەوە.
