گەشتی وشكانیی نێوان عێراق و سعودیە دەستیپێكردەوە و كاروانێك عومرەكار له ڕێگه‌ی دەروازەی سنووریی عەرعەره‌وه بەڕێكرا.
ماوەی 30 ساڵ بوو گەشتی وشكانی لە نێوان عێراق و سعودیەدا ڕاگیرابوو، دواى ئەو ماوە زۆرە، یەکەم گەشتى عومرەكاران كە لە 25 پاس پێكهاتبوو، لە دەروازەی سنووریی عەرعەره‌وه بەرەو سعودیە بەڕێكرا.
دەستەی باڵای حەج و عومرەى عێراق، ڕاگەیەندراوێكی لەو بارەیەوە بڵاوكردەوە و ئاشكرایكرد، ئەو عومرەكارانەی بە ڕێگەی وشكانی بۆ بەجێهێنانی عومرە بەڕێكراون، لە پارێزگاکانی کەرکوک، نەینەوا، بەغداد و ئەنبارەوە چوون و ھەزار و 14 عومرەكار بوون.
دووریی نێوان هەرێمی كوردستان و مەككە زیاتر لە دوو هەزار كیلۆمەترە و گەشتكردن بە ئۆتۆمبێل لە هەرێمەوە بۆ بەجێهێنانی فەریزەی حەج یاخود عومرە، 24 كاتژمێر دەخایەنێت.
