ئەنجێلینا جولی لە پۆستی باڵیۆزی نیازپاکیی نەتەوە یەکگرتووەکان بۆ کاروباری پەنابەران دەستیكێشایەوە.
دوای 21 ساڵ لە كاركردن لە بواری پەنابەر و ئاوارەكان و سەردانیكردنی چەندین وڵات و ناوچەی شەڕ و ناسەقامگیری وەك باڵیۆزی نیازپاکیی نەتەوە یەکگرتووەکان بۆ کاروباری پەنابەران، ئەنجێلینا جولی دەستی لەو پۆستە كێشایەوە.
پێشتر و لە سەروبەندی جەنگی دژ بە تیرۆریستاندا، ئەنجێلینا جولی سەردانی كامپەكانی ئاوارەكانی لە هەرێمی كوردستان و عێراق كردبوو و پشتیوانی و هاوكاریی خۆی پێگەیاندبوون.
ئەنجێلینا جولی ژنە ئەكتەرێكی ناوداری هۆڵیوودە، ئەمریكییە و ساڵی 1975 لەدایكبووە. رۆڵی سەرەكی لە چەندین فیلمی سینەماییدا بینیوە و وەك بەرهەمهێنەری فیلمیش كاردەكات، براوەی خەڵاتی ئۆسكار و سێ خەڵاتی گۆڵدن گڵۆب و چەندین خەڵاتی دیكەی بوارەكانی سینەما و تەلەڤیزیۆنە.
ئەنجێلینا چەند جارێك وەك كاریگەرترین ژنی جیهان دەستنیشانكراوە و سەرباری سینەما، بە كارە مرۆییەكانی و سەرپەرشتیكردن و پەروەردەكردنی منداڵانی بێسەرپەرشت ناسراوە.
