بنجامین پاڤارد، بەرگریکاری باڵی ڕاستی فەرەنسا لەگەڵ ئیدارەی یانەی بایرن میونشن ناگات بە ڕێککەوتن، بڕیاریداوە ئەزموونێکی نوێ لە ژیانی وەرزشییدا تاقیبکاتەوە.
ڕۆژنامەی “بێلد سپۆرت”ی ئەڵمانی نووسیویەتی، بنجامین پاڤاردی فەرەنسی بە خراپترین ساتەکانیدا تێدەپەڕێت، بەوپێیەی لە پێکهاتەی فەرەنسا پشتگوێخراوە و جول کوندی توانیویەتی جێگەی بگرێتەوە، لەسەر ئاستی یانەش لە پێکهاتەی بایرن قورسایی لەدەستداوە و لەم وەرزەدا ئاستی بەپێی پێویست نەبووە.
یاریزانەکەی فەرەنسا لە هاوینی 2024 گرێبەستەکەی کۆتاییدێت، ئامادە نەبووە گرێبەستی نوێ لەگەڵ یانەی بایرن میونشن واژۆبکات، بەڵکو ڕایگەیاندووە، کە دەیەوێت لە هاوینی 2023وە ئەزموونێکی نوێ تاقیبکاتەوە.
بەپێی سەرچاوەکە، یانەکانی پاریس سان جێرمان و بەرشلۆنە خواستیان لەسەر کڕینی نیشانداوە، بەڵام کێشەکە لەوەدایە بەڕێوەبەرانی بایرن نایانەوێت دەستبەرداری بن و ناشزانن بە چ شیوازێک قایلی بکەن لە ئەڵمانیا بەردەوام بێت.
