ژمارەی ئەو رۆژنامەنووسانەی لە زیندانەكاندان گەیشتووەتە 533 رۆژنامەنووس و تەنها لە ئەمساڵدا 57 رۆژنامەنووس كوژراون.
رێكخراوی پەیامنێرانی بێسنوور نوێترین ئاماری لەبارەی رۆژنامەنووسانی زیندانیكراوەوە بڵاوكردەوە و دەڵێت، “لە ساڵی 2022ـدا ژمارەكە ئاستێكی پێوانەیی نوێی تۆماركردووە و 533 رۆژنامەنووس زیندانیكراون”.
بەپێی راپۆرتی رێكخراوەكە، بەراورد بە ساڵی رابردوو، ئەمساڵ 45 رۆژنامەنووسی زیاتر زیندانیكراون، دوای ئەوەی ساڵی رابردوو ژمارەیان 488 رۆژنامەنووس بوو.
لەبارەی ژمارەی ئەو رۆژنامەنووسانەی ئەمساڵ كوژراون، رێكخراوی پەیامنێرانی بێسنوور ئاشكرایكرد، 57 رۆژنامەنووس لە سەرتاسەری جیهاندا كوژراون و بەشێكیان بەهۆی جەنگەوە بوون، ئەوەش بەراورد بە ساڵانی پێشوو بەرزترینە، بەو پێیەی لە ساڵی 2020ـدا 50 رۆژنامەنووس و لە ساڵی 2021ـیشدا 48 رۆژنامەنووس كوژرابوون.
