یانەی یوڤانتۆس دووچاری قەیرانی کارگێڕی بووە و دادگای تۆرینۆ تەنگی پێهەڵچنیون، لەم نێوەندەدا یانەکانی ئارسیناڵ و بایرن میونشن لە هەوڵدان یەکێک لە باشترین یاریزانەکانی ئەو یانەیە پەلکێش بکەن.
تۆڕی “کالچیۆ مێرکاتۆ”ی ئیتاڵی بڵاویکردووەتەوە، دوای دەستلەکارکێشانەوەی ستافی کارگێڕیی یانەی یوڤانتۆس، دادگای تۆرینۆ دەستبەرداری کەیسی هەڵە کارگێڕییەکانیان نەبووە و ڕەنگە لە داهاتوویەکی نزیکدا سزای دارایی و وەرزشیی توند بەسەریاندا بسەپێنێت.
سزاکانیش لێکەوتەی خراپیان دەبێت و ناچاریان دەکات هاوشێوەی ئابڕووچوونی “کالچیۆ پۆلی” کە لە ساڵی 2006 ڕوویدا، دەستبەرداری چەندین یاریزانی پێکهاتەکەیان بن.
لەم نێوەندەدا یانەکانی ئارسیناڵ و بایرن میونشن هەلەکەیان قۆستووەتەوە و خواستیان لەسەر دوشان ڤلاهۆڤیچی سڕبی نیشانداوە.
هەردوو یانە زەبەلاحەکە ئامادەییانن نیشانداوە تێچووی گواستنەوەکە پێشکەشبکەن کە زیاترە لە 80 ملیۆن یورۆ، بۆ ئەو مەبەستەش لەگەڵ لێپرسراوی کارەکانی دەستیان بە دانوستاندن کردووە.
