مردن بە تای خوێنبەربوون لە عێراق سەریهەڵدایەوە، كەسێك بەو نەخۆشییە مرد و پارێزگایەك بە ناوچەی مەترسیداری بڵاوبوونەوەی پەتاكە راگەیەندرا.
ئەمڕۆ یەكشەممە، هاوڵاتییەك دوای تووشبوونی بە تای خوێنبەربوون لە قەزای ئەبو خەسیب لە بەسڕە گیانیلەدەستدا، دوای گەیشتنی تیمی ڤێتێرنەری بە شوێنەكە و ئەنجامدانی پشكنین، دەركەوتووە كەسەكە لە ئەنجامی بەركەوتنی لەگەڵ گۆشتی ئاژەڵی تووشبوو بە تای خوێنبەربوون تووشی نەخۆشییەكە بووە.
وەزارەتی تەندروستی لەبارەی كەیسەكەوە دەڵێت، “بە مەودای 14 كیلۆمەتر لە ماڵی ئەو كەسەی بە تای خوێنبەربوون گیانیلەدەستداوە، بازنەیەكیان دیاریكردووە بۆ پاكژكردنەوە و دەرمانڕشتن و قەدەغەكردنی هاتوچۆی ئاژەڵ لەو ناوچەیەدا”.
بەهۆی ئەو كەیسەی گیانلەدەستدانەوە، بەسڕە بە ناوچەی مەترسیداری بڵاوبوونەوەی تای خوێنبەربوون راگەیەندرا، هۆشداری دەدرێت لە هاوڵاتییان رێكارەكانی خۆپارێزی بگرنەبەر و خۆیان دووربگرن لە دەستدان لە ئاژەڵ و بەرهەمی ئەو ئاژەڵانەی گوماندەكرێت تووشی تای خوێنبەربوون بووبن.
