وەزارەتی دەرەوەی کوەیت رایگەیاند، سێ کەشتی عێراق سنووری ئاوی وڵاتەکەیان بەزاندووە و لە رێگەی باڵیۆزی عێراق لە وڵاتەکەیان ناڕەزایەتی خۆیان لەو رووداوە راگەیاندووە.
وەزارەتی دەرەوەی کوەیت ئەمڕۆ هەینی لە راگەیەندراوێکدا بڵاویکردەوە، “سێ کەشتی عێراقی ئاوی هەرێمایەتی دەوڵەتی کوەیتیان بەزاندووە، بۆ ئەو مەبەستەش پەیامی ناڕەزایەتی خۆمان لە رێگەی باڵیۆزەکەمانەوە گەیاندووەتە عێراق”.
لە بەشێکی دیکەی پەیامەکەدا هاتووە، “دەوڵەتی کوەیت ئامادەی هەر هاوکاریی و هەماهەنگییەکە لەگەڵ دەوڵەتی عێراق، داواکارین عێراقیش هەماهەنگ بێت بۆ پاراستنی ئاسایشی هەردوو دەوڵەتەکە”.
لە ماوەی رابردوودا چەند جارێک لە سەر سنوورە ئاوییەکانیان کێشە کەوتووتە نێوان کوەیت و عێراق، لە سەردانەکەی هەفتەی رابردووی محەمەد شیاع سودانی سەرۆک وەزیرانی عێراق بۆ کوەیت جەخت لە چارەسەرکردنی ئەو کێشانە کرایەوە.
