سەرۆكی ئەنجومەنی نوێنەرانی عێراق گەیشتە تاران و بڕیارە چەند كۆبوونەوەیەك لەگەڵ بەرپرسانی ئەو وڵاتە ئەنجام بدات.
نوسینگەی ڕاگەیاندنی سەرۆکی ئەنجومەنی نوێنەران بڵاویكردەوە، محەمەد حەلبوسی بە یاوەری شاندێکی ئەنجومەنەكە، ئەمرۆ چوارشەممە، گەیشتە تارانی پایتەختی کۆماری ئیسلامی ئێران و لەلایەن جێگری سەرۆكی ئەنجومەنی شورای ئەو وڵاتەوە پێشوازیان لێكراوە.
باسی لەوەشكردووە، سەردانەکەی حەلبوسی لەسەر بانگهێشتی فەرمی محەمەد باقر قالیباف سەرۆکی ئەنجومەنی شورای ئێرانە و دوای كۆبوونەوەی لەگەڵ قالیباف لەگەڵ وەزیری دەرەوە و ئەمینداری ئەنجومەنی ئاسایشی نەتەوەیی ئێران كۆدەبێتەوە.
ئاماژە بەوەشكراوە، سەردانەكە بۆ تاوتوێكردنی دۆخی سیاسیی عێراق و پرسی پێكهێنانی كابینەی نوێی حكومەتە و بڕیارە لەگەڵ بەرپرسانی ئەو وڵاتە كۆبوونەوە ئەنجامبدات.
پێشتر محەمەد حەلبوسی، سەرۆكی ئەنجومەنی نوێنەران بەنیازبوو سەردانی تاران بكات، بەڵام لەلایەن بەرپرسانی ئەو وڵاتەوە ڕەزامەندییان نەدا.
