كرێكارانی بیانی بیمە دەیانگرێتەوە و خانەنشیندەكرێن، وەك وەزیری كار و كاروباری كۆمەڵایەتی لە دوایین لێدوانیدا ئاشكرایكرد و دەڵێت، “یاسا جێبەجێدەكەین”.
سەتام جەدعان وەزیری كار و كاروباری كۆمەڵایەتیی عێراق رایگەیاند، وەزارەتەكە سەرگەرمی رێكخستنەوەی دۆخی كرێكارانی بیانییە و بەپێی رێنماییەكان و لە رێگەی لیژنەیەكەوە دۆخیان باشدەكەن.
وەزیری كار و كاروباری كۆمەڵایەتی وتیشی، “ئەنجومەنی وەزیران لیژنەیەكی پێكهێناوە كە وەزارەتەكانی كار، ناوخۆ و دەرەوە لەخۆدەگرێت و راسپاردەی خۆیان لەبارەی دۆخی كرێكارانی بیانییەوە دەدەن بە ئەنجومەنی وەزیران و لەسەر ئەو بنەمایە بڕیاریان لەبارەوە دەدرێت.
سەتام جەدعان جەختیكردەوە كە یاسای خانەنشینی و بیمەی كۆمەڵایەتی و یاسای كار بەسەر كرێكارانی بیانیدا جێبەجێدەكرێت و لەو مافانە سوودمەند دەبن.
