ئەندامێكی لیژنەی ئاسایش و بەرگری لە ئەنجومەنی نوێنەران و سەكردەیەكی چێوەی هەماهەنگی، دوایین پێشهاتەكانی پڕۆژەیاسای سەربازیی زۆرەملێ ئاشكرادەكەن و كاتی پەیڕەوكردنی ئاشكرادەكەن.
مەلا كەریم شكور ئەندامی لیژنەی ئاسایش و بەرگری لە ئەنجومەنی نوێنەران، لەبارەی دوایین پێشهاتەكانی پڕۆژەیاسای سەربازیی زۆرەملێوە بۆ تۆڕی میدیایی ئێستا دوا و رایگەیاند، “بەهۆی مشتومڕ لەسەر خەرجییەكانی پەیڕەوكردنی خزمەتی سەربازیی زۆرەملێ، پڕۆژەیاساكە رەتكراوەتەوە و بڕیارێكی دیاریكراو بۆ ناردنی بۆ ئەنجومەنی نوێنەران و پەسەندكردنی نییە، بەڵام ئەگەری پەیڕەوكردنی ئەو سیستمە كراوە و چاوەڕوانكراوە”.
وتیشی، لەبارەی بودجەی پێویست بۆ كردنەوەی سەربازگەكان و مووچە و دەرماڵەی سەربازان و ئەو ئەفسەر و كارمەندانەی بۆ جێبەجێكردن و سەرپەرشتیكردنی سیستمەكە پێویستن، ناكۆكی و مشتومڕ هەیە و بەو هۆیەوە حكومەت كشاندوویەتییەوە.
لای خۆیەوە توركی عەتبی سەركردە لە چێوەی هەماهەنگی رایگەیاند، پڕۆژەیاسای سەربازیی زۆرەملێ بە یەكجاری رەتنەكراوەتەوە و بڕیارە لە ساڵی داهاتوودا ببرێتە ئەنجومەنی نوێنەران و پەسەندبكرێت.
ئاشكرایكرد، بڕیارە حكومەت پێداچوونەوە بە بڕگەكانی پڕۆژەیاساكەدا بكات و گرفتەكانی چارەسەربكرێن بۆ ئەوەی بتوانرێت جێبەجێبكرێت.
بەپێی وتەی مەلا كەریم، لە كاتی پەیڕەوكردنی خزمەتی سەربازیی زۆرەملێدا، مووچەی مانگانەی هەر سەربازێكی عێراقی نزیكەی 700 هەزار دینار دەبێت و دوای دوو ساڵ لە پەسەندكردنی، پڕۆژەیاساكە دەخرێتە بواری جێبەجێكردنەوە.
