لەدەستدانی بینایی بەهۆی دەرزیلێدانەوە سەریهەڵدایەوە، چەند هاوڵاتییەك بیناییان لەدەستداوە و كاردانەوەی توندی لێكەوتووەتەوە.
بەپێی زانیارییەكان، ژمارەیەك نەخۆش لە نەخۆشخانەكانی پارێزگای سەڵاحەدین دوای ئەوەی دەرزیی تایبەت بە نەخۆشییەكانی تۆڕی چاویان لێدراوە، بینایی و توانای بینینیان بە رێژەیەكی بەرز لەدەستداوە و لە كوێربوون نزیكبوونەتەوە.
لە كاردانەوەی ئەو رووداوانەدا، ئەمڕۆ شەممە ئیسماعیل خزڕ پارێزگاری سەڵاحەدین، لیژنەیەكی لێكۆڵینەوەی پێكهێناوە و بڕیارە هەموو پزیشك و ستافی ئەو شوێنانەی دەرزییەكەیان بەكارهێناوە لێكۆڵینەوەیان لەگەڵدا بكرێت.
بەپێی بڕیارەكان، نەخۆشەكان لە ناوخۆ و دەرەوەی وڵات چارەسەردەكرێن و دوای تەواوبوونی لێكۆڵینەوەكان، دەبێت لایەنی كەمتەرخەم قەرەبوویان بكاتەوە.
