لویس ئایلا سکرتێری گشتیی رێکخراوی سۆسیالست ئەنتەرناسیونال، پشتیوانیی خۆی بۆ هەرێمی كوردستان دووپاتكردەوە و دەڵێت، “سەرۆک مام جەلال رۆڵی گرنگ و بەرچاوی هەبوو لە چارەسەرکردنی هەموو ئەو کێشانەی رووبەڕووی عێراق و ناوچەکە دەبوونەوە”.
ئەمڕۆ هەینی لە مەدریدی پایتەختی ئیسپانیا، سەعدی ئەحمەد پیرە و لویس ئایلا سکرتێری گشتیی رێکخراوی سۆسیالست ئەنتەرناسیونال و هاوڕێی سەرۆک مام جەلال كۆبوونەوە.
بەپێی راگەیەندراوێك، لە دیدارەکەدا بارودۆخی سیاسیی عێراق و هەرێمی کوردستان و ناوچەکە گفتوگۆی لەبارەوەکراوە، سەعدی ئەحمەد پیرە ئاماژەی بە رۆل و پێگەی رێکخراوە جیهانییەكان و کونسوڵ و باڵیۆزەكان لە عێراق و هەرێمی کوردستان و ناوچەکە كردووە كە چۆن پاڵپشتیی چین و توێژە جیاوازەكانی كۆمەڵگە دەکەن.
لە وەڵامدا لویس ئایلا سکرتێری گشتیی رێکخراوی سۆسیالست ئەنتەرناسیونال رایگەیاندووە، هەموو پاڵپشتییەکی گەلانی عێراق بە گشتی و هەرێمی کوردستان بە تایبەتی دەكات و وتوویەتی، “لە رابردوودا سەرۆک مام جەلال رۆڵی گرنگ و بەرچاوی هەبوو لە چارەسەرکردنی هەموو ئەو کێشانەی رووبەڕووی عێراق و ناوچەکە دەبوونەوە”.
