ئه‌مشه‌و پێنجشه‌ممه، گه‌ڕی یهکهمی قۆناغی کۆمه‌ڵه‌کانی جامی جیهانی 2022 له قه‌ته‌ر به‌رده‌وامی هه‌بوو، هه‌ڵبژارده‌ی پۆرتوگال له یارییه‌کی ئاگریندا بردنه‌وه‌ی به‌رامبه‌ر گانا تۆمارکرد.
هه‌ڵبژارده‌ی پۆرتوگال له یاریگای (استاد 974) یاریی ده‌ستپێکی مۆندیالی 2022ی به‌رامبه‌ر هه‌ڵبژارده‌ی گانا ئه‌نجامدا، یارییه‌که به ئه‌نجامی سێ گۆڵ به‌رامبه‌ر به دوو گۆڵ له به‌رژه‌وه‌ندیی ئه‌ستێره‌کانی فێرناندۆ سانتۆس کۆتاییهات.
گۆڵه‌کانی پۆرتوگال له خوله‌که‌کانی 65، 78، 80 له‌لایه‌ن کریستیانۆ ڕۆناڵدۆ (په‌ناڵتی)، جواو فیلێکس، ڕافائێل لیاو-ه‌وه تۆمارکران، گۆڵه‌کانی گانا له خوله‌که‌کانی 73، 88 له‌لایه‌ن ئه‌ندرێ ئه‌یۆ و عوسمان بوکاری-یه‌وه تۆمارکران.
هه‌ڵبژارده‌ی گانا توانی له زۆرینه‌ی ساته‌کاندا کێبڕکێی به‌ڕازیلییه‌کانی ئه‌وروپا بکات، به‌ڵام له کۆتاییدا ئه‌زموون و کوالێتی به‌رزی پێکهاته‌ی پۆرتوگال یه‌کلاکه‌ره‌وه‌بوو.
به‌پێی ئه‌نجامه تۆمارکراوه‌که، هه‌ڵبژارده‌ی پۆرتوگال به کۆکردنه‌وه‌ی سێ خاڵ چووه پله‌ی یهکهمی گرووپی هه‌شته‌م، له هه‌مان کۆمه‌ڵه‌دا ئورۆگوای و کۆریای باشوور به خاڵێکه‌وه ده‌که‌ونه پله‌کانی دووه‌م و سێیه‌مه‌وه.
