وەزیرانی دەرەوەی یەکێتیی ئەوروپا، ئەمڕۆ دووشەمە 7ی کانونی یەکەم تاوتووێی جێبەجێکردن و میکانیزمەکانی سزادانی تورکیا تاوتوێدەکەن، بەهۆی کێشەی گازی سروشتی لە دەریای ناوەڕاست.
ئاژانسی ڕۆیتەرز بڵاویکردەوە، لە مانگی ڕابردوودا تورکیا جارێکی دیکە کەشتییەکانی گەڕانی لە دەریای ناوەڕاستدا جوڵاند، ئەمەش کاریگەری نەرێنی کردەسەر جارێکی دیکە بەرزبوونەوەی ئاڵۆزییەکان، بەڵام بەرپرسان و دیپلۆماتەکانی یەکێتیی ئەوروپا باسلەوەدەکەن، “بابەتی سزادانی تورکیا هۆکارەکانی فراوانترە لە کێشەی گازی سروشتی و پەیوەستە بە دەستێوەردانەکانی تورکیا لە لیبیا، سوریا هەروەها پەیوەستە بە مامەڵەی لەگەڵ ڕوسیا، ئەمانە هۆکارن کە یەکێتییەکە سوربێت لەسەر سزادانی”.
یەکێتی ئەوروپا دەڵێت، “کەشتیی گەڕان و ڕوپێوییەکانی تورکیا لە ئاوەکانی دەریای ناوەڕاست کە کێشەی لەسەرە لەنێوان تورکیا، یۆنان و قوبرسدا پێشێلکارییە، هەروەها ئەوەشی کە سەبارەت بە گفتوگۆی ئاشتییانە لەنێوانیان سەبارەت بەو ناکۆکییانە مەحاڵە چونکە تاوەکو ئێستا هیچ بەرەوپێشچوونێکی بەرچاومان نەبینییوە”.
شارل میشێل، سەرۆکی ئەنجومەنی ئەوروپی، کە سەرۆکایەتیی لوتکەی یەکێتیی ئەوروپا دەکات، هەفتەی ڕابردوو داوای لە تورکیا کرد دەستهەڵگرێت لە یاری “پشیلە و مشک”، بکشێتەوە لەو هەنگاوە پێشێلکارییانەی هەڵیگرتووە.
