ڕۆژنامەیەکی باوەڕپێکراوی ئەرجەنتین کەشی ژووری جلگۆڕینەکانی هەڵبژاردەی ئەرجەنتینی ئاشکراکردووە، دوای ئەوەی بەرامبەر بە سعوودیە دۆڕاندنیان تۆمارکردووە.
بەپێی زانیارییەکانی ڕۆژنامەی “کلارین”، ئەنجامی یاریی نێوان ئەرجەنتین و سعوودیە چاوەڕواننەکراو بووە، تەنانەت دوای یارییەکە لیۆ مێسی لە ژووری جلگۆڕینەکان هاورێکانی بە “مردوو” وەسفکردووە.
سەرچاوەکە نووسیویەتی، لە کاتی گەڕانەوەی ستافی ئەرجەنتین، بێدەنگی باڵی بەسەر یاریزاناندا کێشاوە، بەڵام مێسی هەستاوە و وتارێکی بەهێز و پالپێوەنەری پێشکەشکردووە، دواتر سەرجەم یاریزانان گەڕاونەتەوە بۆ ژوورەکانی خۆیان و هیچ چالاکییەکیان نەبووە.
دواتر لە کاتی نانخواردی ئێوارەدا هەمووان لەسەر مێزێک کۆبوونەتەوە و گفتوگۆی چڕیان ئەنجامداوە، ئەزمووندارەکان هانی لاوانیانداوە و لاوانیش پابەندبوونی خۆیان دووپاتکردووەتەوە بە گەڕانەوەیەکی بەهێز و بردنەوە لە ڕکابەرەکانی دیکە، تەنانەت ستافی ڕاهێنان بڕیاریانداوە کاتەکانی ڕاهێنان بگۆڕن بە شێوەیەک بۆ یاریزانان گونجاوتر بێت.
