كیم جۆنگ ئون سەرۆكی كۆریای باكوور هەڕەشەی بەكارهێنانی چەكی ئەتۆمی دەكات بۆ وەڵامدانەوەی هەڕەشەكان.
ئەمەش دوای ئەوەی خودی كیم سەرپەرشتی هەڵدانی مووشەكێكی بالیستی نوێ و تۆقێنەری كیشوەربڕ كرد كە ناوی (مووشەكی وەحشی) لێنراوە.
ئاژانسی فەرمی كۆریا بڵاویكردەوە، سەرۆكی وڵاتەكەی سەرەڕای سەرپەرشتیكردنی هەڵدانی مووشەكەكە داوایكرد پەرەی زیاتر بدرێت بە چەكی ستراتیجی و راهێنانی یەكە تەكتیكییە ئەتۆمییەكان.
پیۆنگ یانگ مووشەكێكی بالیستیی كیشوەربڕی هەڵدا كە لە نزیك ئاوەكانی ژاپۆن كەوتەوە، لە دووەم گەورە تاقیكردنەوەی چەكەكە لەم مانگەدا.
كیم جۆن ئون رایگەیاند، ئەگەر دوژمن بەردەوامبێت لە هەڕشەكانی و ئەگەری بەكارهێنانی ئەتۆم، حزب و حكومەت وەڵامی چەكە ئەتۆمییەكان و رووبەڕووبوونەوە راستەوخۆكان دەدەنەوە.
مووشەكی (Hwasong-17) بە گەورەترین مووشەكی بالیستیی كیشوەربڕ دادەنرێت كە تائێستا دروستكرابێت، ئەگەری هەیە توانای گەیاندنی كڵاوەی ئەتۆمی هەبێت بۆ هەر جێگایەك لە ویلایەتە یەكگرتووەكان.
