سەرچاوەکانی بەریتانیا ئاماژە بەوە دەکەن، کە یانەی مانچستەر یونایتد گرێبەستێکی هەژێنەر بۆ دوشان ڤلاهۆڤیچ پێشکەشی یانەی یۆڤانتۆس دەکات.
بەپێی زانیارییەکانی ڕۆژنامەی “زە سەن”ی بەریتانی، ئێریک تێن هاگی ڕاهێنەری یانەی مانچستەر یونایتد ئارەزووی گواستنەوەی دوشان ڤلاهۆڤیچی سڕبی دەکات، داواشی لە ئیدارەی “شەیتانە سوورەکان” کردووە بۆ ئەو مەبەستە لە مێرکاتۆی زستانەدا ئامادەکاری بکەن.
هێرشبەرە لاوەکەی سڕبیا و بیانکۆنێری خواستی زۆرێک لە یانە ئەوروپییەکانی لەسەرە، لە نموونەی پاریس سان جێرمان و بایرن میونشن.
ڤلاهۆڤیچ بە بڕی 81 ملیۆن یۆرۆ پەیوەندی بە یۆڤانتۆسەوە کرد، هەروەها 36 یاری لەگەڵ یوڤێ ئەنجامداوە و 17 گۆڵی تۆمارکردووە و سێ گۆڵی ڕەخساندووە، گرێبەستەکەی لە ساڵی 2026 کۆتایی دێت.
