پۆلیسی دهۆک ڕایگەیاند، بەیانیی ئەمڕۆ لە قەزای شێخان گەنجێک کوژرا، هۆکارەکەشی بەپێی لێکۆڵینەوەی پۆلیس خراپ بەکارهێنانی ئامێری مۆبایل و تۆڕە کۆمەڵایەتییەکان بووە.
لە راگەیەندراوێکدا بەڕێوەبەرایەتیی پۆلیسی دهۆک ئاشکرایکرد، بەیانیی ئەمڕۆ لە کۆمەڵگای چڕە-ی سەربە قەزای شێخان گەنجێکی تەمەن 24 ساڵ کوژرا.
ئاماژە بەوەکراوە، ئەو کەسەی کوژراوە ناوی (محەمەد موسا محەمەد)ە و لەلایەن هاوڕێیەکییەوە تەقەی لێکراوە و کوژراوە.
پۆلیسی دهۆک دەڵێت، بەپێی لێکۆڵینەوەکان هۆکاری ڕووداوەکە خراپ بەکارهێنانی مۆبایل و تۆڕە کۆمەڵایەتییەکان بووە.
تۆمەتبارەکە لەلایەن پۆلیسی شێخانەوە دەستبەسەرکراوە و بەپێی مادەی 406ی سزادانی عێراقی لێکۆڵینەوە لەگەڵیدا بەردەوامە.
