بەڕێوەبەری پۆستە و گەیاندن لە سلێمانی ڕایدەگەیەنێت، ڕاگرتنی بەكارهێنانی سۆشیال میدیا بە ئینتەرنێتی میری لە فەرمانگەكان بۆ ماوەی هەفتەیەك بووە و دەشڵێت، “لە ئێستادا بەكارهێنانی سۆشیال میدیا بە ئینتەرنێتی میری لە فەرمانگەكان ئاسایی بووەتەوە و وەزارەتی گواستنەوە گەیاندن دیراسەی دەكات و دواتر بڕیاری كۆتایی لەبارەوە دەدات”.
دلێر ئیبراهیم، بەڕێوەبەری پۆستە و گەیاندن لە سلێمانی لە لێدوانێكدا بە تۆڕی میدیایی ئێستای ڕاگەیاند، پێشتر بۆ ماوەی هەفتەیەك بەكارهێنانی سۆشیال میدیا بە ئینتەرنێتی میری لە فەرمانگەكان ڕاگیرا كە بەشێوەی ئەزموونی بوو ئێستا ئاسایی بووەتەوە و بە ئینتەرنێتی میریی فەرمانبەران سۆشیال میدیا بەكاردەهێنن تا ئەو كاتەی بڕیاری كۆتایی دەدرێت.
ئاماژەی بۆ ئەوەش كرد، وەزارەتی گواستنەوە و گەیاندن دیراسەی دەكات و دواتر بڕیاری كۆتایی دەدات كە تۆڕە كۆمەڵایەتییەكان بە ئینتەرنێتی میری بەكار بهێندرێن یاخود قەدەغە بكرێن.
لە ماوەی ڕابردوودا بۆ ماوەی یەك هەفتە بڕیاری ڕاگرتنی سۆشیال میدیا بە ئینتەرنێتی میری لە فەرمانگەكان دران كە هەریەك لە فەیسبووك، یوتیوب، سناپ چات و ئینستاگرام داخران و تەنها مامەڵەی فەرمانگەكان كاری لەسەركرا.
