ئەمڕۆ چوارشەممە لە عێراق ساڵی نوێی خوێندنی 2022 – 2023 بە بەشداری 12 ملیۆن خوێندکار دەستیپێکرد.
لەسەر بڕیاری عەلی حەمید دلێمی وەزیری پەروەردەی عێراق ئەمڕۆ چوارشەممە ساڵی نوێی خوێندن لە پارێزگاکانی ناوەڕاست و باشووری عێراق دەستیپێکرد.
بە پێی ئەو زانیاریانەی وەزارەتی پەروەردە بڵاویکردووەتەوە، “ئەمڕۆ زیاتر لە 12 ملیۆن خوێندکار پەیوەندییان بە خوێندنگەکانیان کردووەتەوە، زیاتر لە ملیۆنێک و 200 هەزار منداڵی تەمەن شەش ساڵ چوونەتە پۆلی یەکەمی سەرەتایی”.
یەکێک لەو کێشانەی ساڵانە ڕووبەڕووی خوێندکارانی عێراق دەبێتەوە، کەمی ژمارەی خوێندنگا و کۆنی ژمارەیەک لە خوێندنگەکانە، لەو چوارچێوەیەشدا لە ساڵی پاردا وەزارەتی پلاندانان هەزار و 836 خوێندنگای لە پارێزگا جیاوازەکان دروستکردووە.
بە وتەی فەلاح قەیسی بریکاری وەزارەتی پەروەردەی عێراق، “بۆ پڕکردنەوەی پێداویستییەکانی خوێندکاران و بەڕێوەچوونی پرۆسەی خوێندن پێویستمان بە 10 هەزار خوێندنگەی دیکە هەیە”.
