ساڵح محەمەد عێراقی كە بە وەزیرەكەی سەدر ناسراوە، داوا لە خۆپیشاندەرانی لایەنگری ڕەوتی سەدر دەكات لە بارەگای ئەنجومەنی نوێنەران بكشێنەوە و خۆپیشاندان بگوازنەوە بۆ دەرەوەی ئەنجومەنی نوێنەران.
لە پەیامێكدا وەزیرەكەی سەدر دەڵێت، “دوای ڕزگاركردنی ئەنجومەنی نوێنەران و كردنی بە ئەنجومەنی گەل”، بڕیاریانداوە خۆپیشاندەران لە ماوەی 72 كاتژمێردا لە ئەنجومەنی نوێنەران بچنە دەرەوە و خۆپیشاندان بگوازنەوە بۆ بەردەم یاخود تەنیشت بارەگای ئەنجومەنەكە.
ساڵح محەمەد عێراقی نووسیویەتی، “درێژەدان بە خۆپیشاندان زۆر گرنگە بۆ ئەوەی داواكارییەكانتان جێبەجێبكرێن، بۆیە دەبێت گردبوونەوە بە شێوەی گرووپ ئەنجامبدەن و لە هەندێك كاتی دیاریكراودا گردبوونەوەی گەورە (قەرەباڵغ) بكەن”.
لە كۆتایی پەیامەكەیدا، وەزیرەكەی سەدر ئاشكرایكردووە كە سەرگەرمی پێكهێنانی لیژنەن لە خۆپیشاندەران بۆ ئەوەی ناڕەزایەتییەكان ڕێكبخەن و بەڕێوەیان ببەن و هەرچی پێویست بێت بیكەن”.
