سەرۆكایەتیی شارەوانیی سلێمانی ڕایدەگەیەنێت، پڕۆژەی یەكتربڕی ئارام ماوەی دوو هەفتەیە دەستی بەكارەكانی كردووە و لە ئێستاشدا كارەكانیان لە ژێر زەوییەوە دەستپێكردووە.
بەپێی ڕاگەیەندراوێكی سەرۆكایەتیی شارەوانیی كە وێنەیەكی دەست تۆڕی میدیایی ئێستا كەوتووە و تێیدا هاتووە، پڕۆژەی یەكتربڕی ئارام ماوەی دوو هەفتەیە دەستی بەكارەكانی كردووە و لەئێستادا كارەكانیان لە ژێر زەوییەوە دەستيپێكردووە كە خۆی لەڕێكخستن و چارەسەركردنی ” بۆريی ئاو، كێبڵی كارەبا، هێڵی كوردتێل” هەروەها تۆڕەكانی دیكە كە بوونەتە بەربەست و كێشە لە بەردەم كاركردنیاندا، بە تایبەت لە ژێر زەوییدا.
ئاماژە بۆ ئەوەش كراوە، یەكتربڕی ئارام دەكەوێتە سەر شەقامی بازنەیی مەلیك مەحمود و نزیك گەڕەكی كازیوە كە بە تەواوبوونی ئەم پرۆژەیە خزمەتێكی گەورە بە شاری سلێمانی و سنووری گەڕەكانی كازیوە و دەوروبەری و شەقامی مەلیك مەحمود دەكات و قەرەباڵغی و گرفتی هاتوچۆ چارەسەر دەكات.
