هێزەكانی سوریای دیموكرات دەڵێت، ئەو چەكدارانەی داعش كە هێرشیان كردەسەر ناوچەكەیان، لەناو عێراق و ناوچەكانی ژێر دەستی توركیاوە هاتوون.
فەرماندەیی هێزەكانی سوریای دیموكرات (هەسەدە) ئەمڕۆ كۆنگرەیەكی ڕۆژنامەوانی ئەنجامدا و ئاشكرایكرد، هێرشەكەی سەر بەندینخانەی غوێران لە حەسەكە نیشانیدەدات كە داعش تائێستا “سەرچاوەی كێشەیە، نەك تەنها بۆسەر ناوچەكەمان، بەڵكو بۆسەر كۆی جیهان”.
وتیشی، “ئەوەی لە بەندینخانەی غوێران ڕوویدا ئاماژەیە بۆ هاریكاریی وڵاتانی هەرێمایەتی بۆ ڕێكخراوی داعش”، لەو ڕووەشەوە توركیای تۆمەتباركرد بە ”بەرپرسیاری ئەوەی ناوچەكە ڕووبەڕووی دەبێتەوە لە هێرشی تیرۆرستی”.
فەرماندەیی هەسەدە ئاشكراشیكرد، هێرشەکە لەلایەن چەكدارانی داعش لە ناوچەی سەرێکانی ژێر داگیرکاریی دەوڵەتی تورکیا و عێراقەوە ئەنجامدراون.
سەبارەت بە ئامانجی هێرشەكەش ڕوونیكردەوە، بەگوێرەی ئەو بەڵگانەی دەستیانکەوتووە و هەروەها پشتبەست بە دانپێدانانی ئەو بەرپرسانەی ڕێكخراوەكە کە هێرشەکەیان ئەنجامداوە و دەستگیرکراون، ئەگەر پیلانەکەیان لە زیندانی غوێران ئەنجامی هەبووایە، ئەوا هەم هێرشیان دەکردەسەر گەڕەکەکانی دیکەی حەسەکە و هەمیش لە ناوچەکانی دیکەی وەک هۆل، شەداد و دێرەزوور هێرشیان ئەنجامدەدا و پیلانی بەرفراوانیان دەگێڕا.
چوارشەممەی ڕابردوو هەسەدە كۆنتڕۆڵكردنەوەی تەواوەتی بەندینخانەی غوێرانی ڕاگەیاند، ئەوەش پاش حەوت ڕۆژ ڕووبەڕووبوونەوە و هەڵمەتی ئەمنی لەگەڵ پاشماوەی چەكدارانی داعش.
هێرشەكە، كە پێنجشەممەی پێشتر 20ی ئەم مانگە ئەنجامدرا، بە “گەورەترین و توندترین” هێرشی داعش لەدوای ڕووخان و شكستی “دەوڵەتی خەلافەت” دادەنرێت.
سەبارەت بە ئاماری ڕووبەڕووبوونەوەكانیش فەرماندەیی هەسەدە ڕایگەیاند، 121 کارمەند و شەڕڤان شەهیدبوون، کە 77یان کارمەندی زیندانەکە بوون و 40یان شەڕڤانی هەسەدە بوون و، چوار هاوڵاتیی مەدەنییش شەهیدبوون، هەروەها 374 چەكداری داعش کوژراون.
