لە بارەی تۆپباران و بۆردومانەكانی ئێران بۆ سەر خاكی هەرێمی كوردستان، فوئاد حسێن وەزیری دەرەوەی عێراق بانگێشتی ئەنجومەنی نوێنەران دەكرێت.
لە لێدوانێكدا بۆ تۆڕی میدیایی ئێستا، د. گەیلان قادر ئەندامی فراكسیۆنی یەكێتیی نیشتمانیی كوردستان ڕایگەیاند، ئیمزای زیاتر لە 90 پەرلەمانتار لە فراكسیۆنە جیاوازەكان كۆكراوەتەوە و لە ڕێگەی پێشكەشكردنیان بە سەرۆكایەتیی ئەنجومەنی نوێنەران، داوای ڕێكخستنی دانیشتنێكی ئاسایی ئەنجومەنی نوێنەران دەكرێت.
پەرلەمانتارەكەی فراكسیۆنی یەكێتیی نیشتمانیی كوردستان وتی، مەبەست لە كۆبوونەوەكە، بانگێشتكردنی فوئاد حسێن وەزیری دەرەوەی عێراقە لە بارەی تۆپباران و بۆردومانەكانی ئێران بۆ سەر خاكی هەرێمی كوردستان.
د. گەیلان قادر ڕاشیگەیاند، لە ڕێگەی ئەنجومەنی نوێنەرانەوە ناڕەزایی عێراق دەگەیەنن بە ئێران لە بەرامبەر هێرش و پێشێلكارییەكان.
