وەزارەتی خوێندنی باڵا بۆ ئەمساڵیش بە نرخی کەمکراوە دەرگای کورسییەکانی پارالێڵی بۆ خوێندکارانی خوێندنی باڵا کردووەتەوە، بەڵام بەڕێوەبەری گشتی لە وەزارەتی خوێندنی باڵا دەڵێت، “ڕێنمایی نوێمان دەبێت”.
لە لێدوانێکدا بۆ تۆڕی میدیایی ئێستا توانا نەجەف بەڕێوەبەری گشتی لە وەزارەتی خوێندنی باڵا و توێژینەوەی زانستی ڕایگەیاند، وەزارەتی خوێندنی باڵا لەم کابینەیەدا خوێندنی پارالێڵی ئاسانتر کردووە و نرخەکەی کەمکردووەتەوە.
ئاماژەی بەوەکرد، کە وەزیری خوێندنی باڵا بە ڕێژەی 45% کرێی خوێندنی پارالێڵی کەمکردەوە، بەڵام بۆ ئەمساڵ لەگەڵ ئەوەی ئەو کەمکردنەوەیە بەردەوام دەبێت ڕێنمایی نوێشمان دەبێت.
لەگەڵ ئەوەشدا کرێی خوێندن لە بەشێکەوە بۆ بەشیکی دیکە جیاواز دەبێت و هەریەکە بەپێی ئەو نرخەی دیاریکراوە 45%ی کەمدەکرێتەوە، ئەگەر بۆ ئەمساڵ زیاتر کەمنەکرێتەوە، دکتۆر توانا نەجەف وای وت.
سەبارەت بە ڕاگەیاندنی کورسییەکانی پێشکەشکردنی خوێندنی ماستەر و دکتۆرا وتی، “بۆ ئەمساڵ ڕاگەیاندنی پێشکەشکردن دواناکەوێت، بەڵکو لە ماوەیەکی نزیکدا ڕایدەگەیەنین”.
جەختیکردەوە، کە پێش سەری ساڵی نوێ دەرگای پێشکەشکردن بۆ خوێندنی ماستەر و دکتۆرا دەکەنەوە وتی، “لە ماوەیەکی زۆر نزیکدا ڕایدەگەیەنین”.
لە ماوەی ڕابردوودا وەزارەتی خوێندنی باڵا و توێژینەوەی زانستیی هەرێمی کوردستان، ڕێنماییەکانی خوێندنی ماستەر و دکتۆرای بڵاوکردەوە.
