لە وڵاتی زیمبابۆی سێ ئەندامی خێزانێک بەهۆی پێوەدانی یەک مارەوە یەک بەدوای یەک گیانیان لەدەستدا.
پێگەی نیوز ویک ڕایگەیاند، ” لە گوندی مۆریمبیکای زیمبابۆی ژنێک و کچێکی و برازایەکی یەک مار پێوەی داون و یەک بەدوای یەک گیانیان لەدەستداوە”.
ئاشکراشیکرد، “ڕووداوەکە بە شێوەیەک بووە، سەرەتا مارەکە بە کچی ماڵەکەوەی داوە کاتێک دایکی ویستوویەتی یارمەتی بدات و دووریبخاتەوە مارەکە بە سنگییەوە داوە، لەو کاتەشدا برازاکەی لەماڵەکەیان بووە کە ڕووداوەکەی بینیوە لە ترساندا ڕایکردووە، بەڵام مارەکە بە قاچی ئەویشیەوە داوە”.
ئاماژەی بەوەشکردووە، ” هەرچەندە بریندارەکان گەیەندراونەتە نەخۆشخانە، بەڵام بەهۆی درەنگ گەیشتنیان و ژەهراویبوونی مارەکە گیانیان لەدەستداوە”.
ئەو مارەی خێزانەکەی کردووەتە قوربانی لە جۆری مامبای ڕەشە، کە بە مەترسیدارترین و خێراترین مار لە ئەفریقا ناسراوە.
