بە بڕیاری وەزارەتی ڕۆشنبیری، ئەنجامدانی فێستیڤاڵی كەلتوورە جیاوازەكان ڕاگیرا و هۆكارەكەشی بۆردومانەكانی ئێران دەگەڕێنێتەوە.
وەزارەتی ڕۆشنبیری و لاوانی حكومەتی هەرێم ڕوونكردنەوەیەكی بڵاوكردەوە و ڕایگەیاند، بڕیاربوو لە ڕۆژانی 2022/9/29 تا 2022/10/2 هەشتەمین فێستیڤاڵی کەلتوورە جیاوازەکان سازبكرێت، کە ساڵانە وەزارەتەكە لە ڕانیە بە ئامادەبوونی چەندین گروپ و تیپی هونەریی چەندین وڵاتی جیهان سازدەکرێت.
دەشڵێت، بەهۆی ئەو بارودۆخە نەخوازراوەی پێشهات، لە بۆردومانکردنی خوشک و برایانی ڕۆژهەڵات و شەهید بوونی ژمارەیەک هاوڵاتیی سڤیل. بە بڕیاری وەزیری ڕۆشنبیری و لاوان فێستیڤاڵەکە ڕاگیرا.
دوێنێ هێزەكانی كۆماری ئیسلامیی ئێران لەڕێی درۆن و مووشەكی بالیستییەوە ژمارەیەك هێرشی بۆسەر بارەگای پارتە كوردییەكانی ڕۆژهەڵاتی كوردستان لە كۆیە، پردێ و زڕگوێز ئەنجامدا و بەهۆیەوە 15 کەس گیانیان لەدەستداوە و 46 کەسی دیکەش برینداربوون.
