بەڕێوەبەرایەتی پۆلیسی نەجەف، دەستگیرکردنی کەسێکی بە تۆمەتی دزیکردن ڕاگەیاند کە بە ئەبو باڕۆکە ناسرابوو.
عەقید عەلاوی حسێن ئەلحەجامی، بەڕێوەبەری بەرەنگاربوونەوەی تاوانی نەجەف بڵاویکردەوە، ” لەدوای وەرگرتنی زانیاری ورد لەبارەی کەسێکەوە، کە هەستاوە بە ئەنجامدانی چەندین تاوانی دزی، بەڵام شێوەی خۆی گۆڕیوە بۆ ئەوەی نەناسرێتەوە، توانرا دەستگیربکرێت”.
ئاشکراشیکرد، ” تۆمەتبارەکە، لەکاتی ئەنجامدانی تاوانی دزیکردن باڕۆکە “قژی دەستکرد”ی بەکارهێناوە بۆ ئەوەی لەلایەن هێزە ئەمنییەکانەوە نەناسرێتەوە دواتریش لایبردووە و ژیانی ئاسایی خۆی کردووە”.
ئاماژەی بەوەشکرد، ” بەپێی ئەو زانیاریانەی کۆمانکردەوە بۆمان دەرکەوت تۆمەتبارەکە لە یەکێک لە گەڕەکەکانی باکووری پارێزگای نەجەف ژیاوە، بۆیە دەستبەجێ لەڕێگەی تیمێکەوە هەر لەوێ دەستگیرکرا”.
