بەڕێوەبەری کۆمسیۆنی مافەکانی مرۆڤ لە بەسرە رایگەیاند، لە ساڵێکدا نۆ هەزار کەس لە پارێزگاکە تووشی نەخۆشی شێرپەنجە دەبن.
مەهدی تەمیمی بەڕێوەبەری کۆمسیۆنی مافەکانی مرۆڤ لە بەسرە رایگەیاند، “مەسەلەی پیسبوونی ژینگە لە پارێزگای بەسرە دۆخی ئاسایی تێپەڕاندووە و گەیشتووە بە ئاستێکی مەترسیدار و کارەساتی مرۆیی”.
وتیشی، “ساڵانە بەهۆی پیسبوونی ژینگەوە لە پارێزگاکە نۆ هەزار کەس تووشی نەخۆشی شێرپەنجە دەبن، ئەگەر بەم حاڵەش بێدەنگی لێبکرێت لە پێنج ساڵی داهاتوودا ژمارەی تووشبووانی ساڵانە دەگاتە 40 هەزار کەس”.
پیسبوونی ئاووهەوای بەسرە بەهۆی ئەو غازە ژەهراوییانەوەیە کە لە ئەنجامی سووتانی سووتەمەنی کێڵگە نەوتییەکان دروستدەبن و لە ئەنجامدا پلەکانی گەرمای پارێزگاکەیان بەرزکردووەتەوە تەنانەت لە کاتی بارانبارینیش لەگەڵ باران کارلێک دەکەن.
