ژنە كارگوزارێكی فلیپینی، منداڵێكی كۆرپەی بە ئەشكەنجەدان كوشتووە و دادگا لەگەڵ سەپاندنی بڕیاری سزادانیدا، وردەكاریی چیرۆكەكە ئاشكرادەكات.
دەسەڵاتی دادوەریی ئوردن ئەمڕۆ یەكشەممە بڵاویكردەوە، ژنێكی فلیپینی بەهۆی ئەوەی لە ماڵان وەك كارگوزار كاردەكات و هاوسەرەكەی لە گەشتی درێژخایەنی كار بووە لە دەرەوەی ئوردن، منداڵە كۆرپەكەی سپاردووە بە ژنە كارگوزارێكی دیكە كە ئەویش فلیپینییە و مانگانە بە 120 دیناری ئوردنی بەخێویكردووە.
بەپێی ڕاگەیەندراوی دادگاكە، منداڵەكە كچ بووە و ڕووداوەكە دەگەڕێتەوە بۆ ساڵی 2020 كە ئەو كات تەمەنی قوربانییەكە كەمتر بووە لە دوو ساڵ، كارگوزارەكە بەردەوام منداڵەكەی ئەشكەنجەداوە و تەنانەت بە ڤیدیۆ تۆماریكردووە.
ئەو منداڵە كە بە ئەشكەنجەدانێكی زۆر گیانی سپاردووە، بە ئاسن لێیدراوە و بووراوەتەوە، دواتر “بكوژەكە” پەیوەندیی بە ناسیاوێكییەوە كردووە و ئەویش منداڵەكەی بردووە بۆ نەخۆشخانە، پشكنینەكان دەریانخستووە كە جگە لە برینداربوونی ڕووخسار و دەست و قاچەكانی، مێشكی زەبری بەركەوتووە و ئاوساوە، هەروەها شوێنەواری چەندین ئەشكەنجەدانی پێشتر بە جەستەی منداڵەكەوە بوون كە دوایینیان هەفتەیەك پێش كۆتا ئەشكەنجەدان و كوژرانی بووە.
لە پای ئەنجامدانی تاوانەكەدا، دادگای تاوانەكانی ئوردن سزای كاركردنی زۆرەملێی هەتاهەتایی بەسەر “تاوانبار”ـەكەدا سەپاندووە.
