ئۆتۆمبێلێكی بارهەڵگر لە بەردەم تونێلی دەربەندیخان وەرگەڕا، هاتوچۆی دەربەندیخان دەڵێت، شۆفێرەكە سەلامەتە.
ئێوارەی ئەمڕۆ شەممە، ئۆتۆمبێلێکی جۆری مسیۆبۆشی کانتەر کە سەوزە و میوەی بارکردبوو، لە بەردەم تونێلی دەربەندیخان کۆنترۆڵی لەدەستدا و وەرگەڕا.
بەڕێوەبەرایەتیی هاتوچۆی دەربەندیخان ڕاگەیەندراوێكی لەبارەی ڕووداوەكەوە بڵاوكردەوە و دەڵێت، شۆفێری بارهەڵگرەكە سەلامەتە.
ڕێگای سلێمانی – دەربەندیخان – كەلار بە ڕێگای مەرگ ناودەبرێت و ئەمە دووەم ڕووداوی هاتوچۆ بوو كە ئەمڕۆ لەسەر ئەو ڕێگایە ڕوویانداوە. پێشتر و لە بەرەبەیانی ئەمڕۆدا، بەهۆی پێکدادانی سێ بارهەڵگر و تاکسییەکەوە لەسەر ڕێگای زەڕایەن – دەربەندیخان، چوار کەس برینداربوون.
