لەلایەن كەسانی نەناسراوەوە لە كەلار تەقە لە مامۆستایەك كرا و پۆلیسی گەرمیان دەڵێت، فەرمانی دەستگیركردن بۆ تۆمەتبار دەرچووە.
عەلی جەمال قدووری، وتەبێژی پۆلیسی گەرمیان ڕایگەیاند، نیوەڕۆی ئەمڕۆ لە گەڕەکی ڕاپەڕینی قەزای کەلار لەنێو ئۆتۆمبێلێکی جۆری بیکاشۆ لەلایەک کەسانی نەناسراوەوە لە پێش دەرگای ماڵی خۆیان تەقە لە مامۆستایەکی ئامادەیی شێروانە کرا، فیشەک بەر دەستی کەوتووە و برینداربووە.
دوای ڕووداوەكە قوربانییەكە لە نەخۆشخانەی فریاکەوتنی شەهید هەژار لە کەلار چارەسەری پێویستی بۆکراوە.
عەلی جەمال وتی، دادوەر بەپێی مادەی 406 فەرمانی دەستگیرکردنی بۆ تۆمەتبار دەرکردوە، هێزەكانی پۆلیسیش چوونەتە شوێنی ڕووداوەكە و لێكۆڵینەوەیان كردووە و لە هەوڵی ئاشکراکردنی ناسنامە و دەستگیرکردنی تۆمەتباردان.
