دوو بەڕێوەبەری وەرزشیی یانەی پاریس سان جێرمان، لە مێرکاتۆی هاوینی 2022 بە ئاراستەی جیاواز کاریان کردووە.
بەپێی زانیارییەکانی ڕۆژنامەی لیکیپی فەرەنسی، واژۆکردنی گرێبەستی کارلۆس سۆلێر لە یانەی ڤالێنسیا-وە کەلێنێکی گەورەی لە نێوان لویس کامپۆس و ئانتێرۆ هێنریکی بەڕێوەبەرانی یانە زەبەلاحەکەی پاریسدا دەرخستووە.
بەپێی سەرچاوەکە، بەیانیی ڕۆژی سێشەممە کامپۆس گەیشتووەتە ڤالێنسیا و گرێبەستێکی بەبڕی (18) ملیۆن یورۆ بۆ گواستنەوەی سۆلێر پێشکەش کردووە، لە هەمان ڕۆژدا هێنریکی گەیشتووەتە پاریس و گرێبەستێکی بە شێوازی خواستن پێشکەش کردووە، لە کۆتاییشدا گرێبەستەکەی کامپۆس واژۆ کراوە.
سەرچاوەکە جەخت لەوە دەکاتەوە، هەریەکە لە بەڕێوەبەرەکان ئەرکێکیان پێدراوە، کامپۆس بۆ گفتوگۆی یاریزانان و هێنریکی بۆ دانوستاندن لەگەڵ یانەکان، بەڵام هەندێک جار چوونەتە ناو سنووری یەکدییەوە و کێبڕکێیەکی توند لە نێوانیاندا دروست بووە.
لیکیپ نووسیویەتی، جەنگی نێوان دوو بەڕێوەبەرەکە بووەتە هۆی شکستهێنان لە فرۆشتنی چەندین یاریزان لە نێوانیاندا کیلۆر ناڤاس، هەروەها کڕینی میلان سکرینیار لە ئینتەر میلان.
